دیمونا، عراد کے بعد تل ابیب اور ایلات پر حملہ، 8 افراد ہلاک

تہران : ایران نے اسرائیلی شہر دیمونا اور عراد کے بعد تل ابیب اور ایلات پر بھی میزائل برسادئے۔ جس سے بڑے پیمانے پر تباہی ہوئی۔ ہلاک افراد کی تعداد آٹھ ہوگئی۔ دو سو بیس افراد زخمی ہوگئے۔ ایران نے جنوبی اسرائیل کے دونوں شہروں پر الفتح اور خیبر میزائلوں سے حملہ کیا۔ دفاعی نظام میزائل روکنے میں ناکام ہوگیا اور میزائلوں نے ہرطرف تباہی مچادی۔ سب سے زیادہ نقصان عراد میں ہوا۔ جہاں بیس سے زائد عمارتیں ملیا میٹ ہوگئیں اور متعدد کو نقصان پہنچا۔ حملے میں درجنوں افراد زخمی ہوئے پندرہ سے زائد زخمیوں کی حالت تشویشناک ہے۔
دیمونا میں بھی ہر طرف تباہی مچ گئی کئی میزائل اسرائیل ایٹمی تنصیب سے چند کلومیٹر دور گرے۔ حملوں میں ستر سے زائد افراد زخمی ہوئے۔ ایران نے چند گھنٹوں بعد ایلات اور تل ابیب پر بھی کلسٹر میزائل داغ دئے۔ جس سے دونوں شہروں میں عمارتوں کو نقصان پہنچا اور بیس سے زائد افراد زخمی ہوئے جس میں سے دو دم توڑ گئے۔ ایران نے آبنائے ہرمز کے قریب ایک اور ایف سولہ طیارے کو نشانہ بنادیا۔