Raza Musani 
واشنگٹن : امریکی صدر ڈونلڈ ٹرمپ کی انتظامیہ نے خلیجی ممالک کو مشورہ دیا ہے کہ ایران کے جوابی حملوں سے متاثرہ انفراسٹرکچر کی بحالی کے لیے امریکی کمپنیوں سے رجوع کیا جائے۔ امریکی پالیسی کے تحت معاشی مفادات کو ترجیح دیتے ہوئے اس عمل کو ‘سب سے پہلے امریکا’ حکمت عملی کا حصہ قرار دیا گیا ہے۔ میڈیا رپورٹس کے مطابق امریکا نے کویت، بحرین اور متحدہ عرب امارات کو ممکنہ خریداروں کے طور پر نامزد کیا ہے تاکہ وہ اپنے تباہ شدہ انفراسٹرکچر کی تعمیر نو کے لیے امریکی انجینئرنگ، مینوفیکچرنگ اور تعمیراتی کمپنیوں کی خدمات حاصل کریں۔ امریکی حکام کا کہنا ہے کہ خلیجی ممالک اور امریکا کے درمیان معاشی شراکت داری کو مضبوط بنانا تعمیر نو کے عمل میں اہم کردار ادا کرے گا۔ تاہم ایک عرب عہدیدار نے اس اقدام کو غیرحساس قرار دیتے ہوئے کہا کہ خطہ اب بھی ممکنہ جنگ کے خدشات سے دوچار ہے اور امریکا کی سیکیورٹی یقین دہانیوں پر تحفظات موجود ہیں۔
