نصاب سے متعلق اہل تشیع کے خدشات قابل غور ہیں، چیئرمین اسلامی نظریاتی کونسل

اسلام آباد: مجلس وحدت مسلمین کے اعلی سطح کے وفد نے چیئرمین اسلامی نظریاتی کونسل قبلہ ایاز سے ملاقات کی اور انہیں نصاب تعلیم میں ملت جعفریہ کے تحفظات سے آگاہ کیا۔ علامہ مقصود ڈومکی نے کہا کہ اتحاد و وحدت اور اسلامی اخوت کی فضا کے لیے مذہبی ہم آہنگی اور بنیادی عقائد کا باہمی احترام انتہائی ضروری ہے۔ مسلکی متنازع نصاب تعلیم سےقومی وحدت کو شدید نقصان پہنچنے کا خدشہ ہے۔ وزارت تعلیم نے نصاب مرتب کرتے وقت ملت تشیع کو یکسر نظرانداز کیا ہے۔ چیئرمین اسلامی نظریاتی کونسل نصاب سے متعلق خدشات کو قابل غور قرار دیا اور کہا کہ تمام مکاتب فکر کے درمیان اتحاد کا فروغ اور دین اسلامی تعلیمات کی روشنی میں امور مملکت کو دیکھنا کونسل کا بنیادی ہدف ہے۔ نصاب تعلیم وزارت تعلیم کا مسئلہ ہے لیکن دینی اور مذہبی نقطہ نگاہ کے حوالے سے اسلامی نظریاتی کونسل بھی اپنا آئینی کردار ادا کرے گی۔ اسلامی نظریاتی کونسل کے ڈائریکٹر ریسرچ خدشات اور نصاب تعلیم کے امور کا جائزہ لیں گے۔