Raza Musani 
بیجنگ : چین کے صدر شی جن پنگ نے وسط ایشیائی ممالک کی ترقی کیلئے جامع منصوبے کا اعلان کر دیا۔ چین میں جاری چین۔وسطی ایشیا سربراہ کانفرنس سے خطاب میں صدر شی جن پنگ نے کہا کہ چین قازقستان، کرغزستان، تاجکستان، ترکمنستان اور ازبکستان کے ساتھ ترقیاتی حکمت عملی کو مربوط کرنے کیلئے تیار ہے۔ منصوبے میں انفرااسٹرکچر تعمیر کرنے سے لے کر تجارت کا فروغ شامل ہے۔ صدر شی جن پنگ نے کہا کہ چین وسط ایشیائی ریاستوں کو ان کے قانون نافذ کرنے والے اداروں، سیکیورٹی اور دفاعی صلاحیت کی تعمیرات میں مدد فراہم کرسکتا ہے۔ان کا کہنا تھا کہ چین دو طرفہ سرمایہ کاری معاہدوں اور بین السرحد مال برداری حجم کو بڑھا سکتا ہے۔انہوں نے کہا کہ وسط ایشیا کی ترقی اور تعاون کیلئے چین 3.8 ارب ڈالر فراہم کرے گا۔ ان کا کہنا تھا کہ چین بحیرہ قزوین میں بین الاقوامی ٹرانسپورٹ کوریڈور کی حمایت کرتا ہے اور چین اور یورپ کے درمیان ٹرین سروسز کیلئے بھی ٹرانسپورٹ مراکز کی تعمیر کو مستحکم کرے گا۔
