Raza Musani 
غزہ : اسرائیلی فوج نے غزہ میں گھروں، پیٹرول اسٹیشن اور اسکول میں قائم پناہ گاہ پر حملے کرکے خواتین اور بچوں سمیت باسٹھ فلسطینی شہید اور درجنوں زخمی کردئے۔ جبکہ جھڑپ میں ایک صیہونی فوجی ہلاک ہوگیا۔ شمالی غزہ میں اسکول میں قائم پناہ گاہ پر حملے سے آگ لگ گئی ۔ جس کے نتیجے میں بائیس فلسطینی شہید ہوگئے۔ جس میں بیشتر خواتین اور بچے ہیں۔
دیر البلاح پر حملے میں تیرا جبکہ نصیرات کیمپ میں پندرہ فلسطینیوں کو شہید کیا گیا۔ خان یونس پر دو حملوں میں دس فلسطینی شہید کردئے گئے۔ صیہونی فوج نے جبالیہ اور محفوظ قرار دئے گئے المواصی میں مختلف مقامات پر شدید بمباری کی۔ شمالی غزہ میں صیہونی فوجیوں اور مزاحمت کاروں میں شدید جھڑپ ہوئی ہے۔ جس میں ایک صیہونی فوجی ہلاک اور تین زخمی ہوگئے۔
ادھر خان یونس سے انخلا کے حکم کے بعد لوگ افراتفری میں علاقے خالی کرکے نکل رہے ہیں۔ مقامی میڈیا آفس کے مطابق اب تک ایک لاکھ افراد المواصی کی طرف نقل مکانی کرچکے ہیں دوسری جانب تین ماہ بعد امدادی سامان کے نو ٹرک غزہ میں داخل ہوئے ہیں۔ جو لاکھوں متاثرین کیلئے انتہائی ناکافی ہیں۔
