Raza Musani 
تل ابیب: اسرائیلی میڈیا کے مطابق وزیرِ اعظم بنیامین نیتن یاہو اور وزیرِ دفاع اسرائیل کاٹز نے خاموشی سے جنوبی غزہ کے علاقے رفح میں فلسطینیوں کے لیے رہائشی منصوبے کے قیام کی منظوری دے دی ہے۔ اسرائیلی ریڈیو کے مطابق منصوبہ اسرائیلی فوج کے زیرِ کنٹرول علاقے گرین رفح میں شروع کیا جائے گا۔ جو نام نہاد یلو لائن کے ذریعے فلسطینیوں کی نقل و حرکت والے علاقوں سے الگ کیا گیا ہے۔رپورٹ کے مطابق یہ علاقہ مکمل طور پر ہموار اور خالی کرایا جا چکا ہے اور مستقبل میں کثیر ملکی فورس کے کنٹرول میں ہوگا۔ منصوبے کے تحت بجلی، پانی اور نکاسیٔ آب کے نظام بچھانے کے لیے کھدائی سمیت بنیادی ڈھانچے کا کام کیا جائے گا۔ اسرائیلی سکیورٹی ذرائع کے مطابق غزہ سے تعلق رکھنے والے فلسطینی کارکن منصوبے پر کام کریں گے، جن کی شن بیت کے ذریعے سکیورٹی جانچ جاری ہے۔ نیتن یاہو کے دفتر نے رپورٹ کو حقائق کے منافی اور پرانی معلومات کی دوبارہ اشاعت قرار دیتے ہوئے کہا ہے کہ یہ متحدہ عرب امارات کا پائلٹ منصوبہ ہے۔
