پاکستانیوں کا خون بہانے والے دہشت گردوں کو عبرت کا نشان بنائیں گے، ایپکس کمیٹی

پشاور: پاکستان نے دہشت گردی کے معاملے پر افغانستان سے دو ٹوک بات کرنے کا فیصلہ کیا ہے۔ وزیراعظم شہباز شریف کی زیر صدارت ایپکس کمیٹی کا اجلاس ہوا ۔ اجلاس میں آرمی چیف اور ڈی جی آئی ایس آئی نے امن وامان کے حوالے سے بریفنگ دی۔ شرکا نے دہشت گردی کا یکجا ہوکر مقابلہ کرنے پر اتفاق کیا۔ اجلاس نے قوم کو یقین دلایا کہ پاکستانیوں کا خون بہانے والے دہشت گردوں کو عبرت کا نشان بنائیں گے، معصوم پاکستانیوں پر حملہ کرنے والے ہر صورت سزا پائیں گے۔ اجلاس پختہ عزم ظاہر کرتا ہے کہ ہر قیمت پر قوم کے جان ومال کا تحفظ یقینی بنائیں گے۔ اس کی امیدوں اور اعتماد پر پورا اتریں گے۔ اپیکس کمیٹی نے کہا کہ پاکستانیوں کا خون بہانے والے دہشت گردوں کو عبرت کا نشان بنائیں گے، دہشت گردی کی بیخ کنی کیلئے ریاست کے تمام اداروں کو اشتراک عمل سے کام کرنا ہوگا، مشترکہ قومی اہداف کے حصول کے جذبے سے کام کرنا ہوگا، مشترکہ اہداف کے حصول کیلئے ضرورت کے مطابق قانون سازی کی جائے گی۔اعلامیے کے مطابق کمیٹی نے کہا کہ ملک کے اندر دہشت گردوں کی معاونت کرنے والے تمام ذرائع ختم کرنے پر بھی اتفاق کیا گیا، دہشت گردی کی ہر قسم اور ہر شکل کیلئے زیرو ٹالرنس کا رویہ قومی نصب العین ہوگا۔