تیل سستا کرنے کے تمام امریکی اقدامات ناکام ہو رہے ہیں، قالیباف

تہران: ایرانی اسپیکر باقر قالیباف نے تیل کی بڑھتی قیمتیں روکنے کی امریکی کوششوں کا مذاق اڑاتے ہوئے کہا ہے کہ واشنگٹن کے تمام اقدامات ناکام ہو رہے ہیں۔ تیل کی قیمتیں ایک سو آٹھ ڈالر تک جاپہنچی ہیں۔ قالیباف نے کہا کہ امریکی محکمہ خزانہ نے دعویٰ کیا تھا کہ وہ تیل کی قیمتیں کم کرنے کیلئے اپنے تمام ممکنہ اقدامات استعمال کرے گا۔ قالیباف نے کہا کہ امریکی اقدامات میں غلط خبریں پھیلانا، مارکیٹ میں مداخلت اور اسٹریٹجک ذخائر سے تیل جاری کرنا شامل ہیں لیکن یہ اقدامات قیمتوں میں اضافے کا رخ تبدیل نہیں کرسکے۔ قالیباف نے امریکی اقدامات کی متوقع ترتیب کو ظاہر کرنے والے ایک گراف کا حوالہ دیتے ہوئے کہا کہ آنے والے اقدامات پہلے سے واضح ہیں۔ انہوں نے طنزیہ انداز میں کہا کہ ایسا ظاہر کریں جیسے آپ کو معلوم ہی نہیں کہ آگے کیا ہونے والا ہے۔