سعودیہ کے بعد بحرین بھی ایران سے سفارتی تعلقات بحال کرنے پر آمادہ

مناما: سعودی عرب کے بعد بحرین نے بھی ایران کے ساتھ سفارتی تعلقات بحال کرنے پر آمادگی ظاہر کردی۔ بحرین کے دارالحکومت مناما میں انٹرنیشنل پارلیمنٹری کانفرنس کے موقع پر ایرانی پارلیمانی وفد نے بحرینی اسپیکر أحمد بن سلمان المسلم سے ملاقات کی۔ ملاقات میں دوطرفہ تعاون کےفروغ پر بات ہوئی۔ بحرینی اسپیکر نے سفارتی تعلقات کی بحالی اور دونوں ممالک کے سفارتخانے دوبارہ کھولے جانے پر زور دیا ہے۔ ملاقات کے دوران دونوں ممالک میں براہ راست پروازیں شروع کرنے پر بھی اتفاق کیا گیا۔ ادھر سعودیہ ایران تعلقات کی بحالی کا عرب لیگ نے بھی خیرمقدم کیا ہے۔ عرب لیگ کے سیکریٹری جنرل احمد ابو الغیط نے کہا ہے کہ دونوں ممالک کے درمیان سفارتی تعلقات بحال کرنے کا معاہدہ علاقائی استحکام کے حصول میں معاون ثابت ہو سکتا ہے۔ یہ ایک ایسا قدم ہے جو دو طرفہ تعلقات میں ایک نئے مثبت مرحلے کی نشاندہی کررہا ہے۔ یہ معاہدہ علاقائی استحکام کے حصول میں اپنا کردار ادا کرنے میں کارآمد ثابت ہو گا۔