Raza Musani 
ابوظہبی : شام کے صدر بشارالاسد کا طویل عرصے بعد متحدہ عرب امارات پہنچنے پر شاندار استقبال کیا گیا۔ مشرق وسطیٰ کی سیاست میں بڑی تبدیلیاں رونما ہورہی ہیں۔ سعودی عرب اور ایران کے درمیان معاہدے کے بعد شام بھی سفارتی تنہائی سے نکل رہا ہے۔ عمان کے بعد شام کے صدر بشار الاسد طویل عرصے بعد متحدہ عرب امارات پہنچ گئے۔ صدر بشار الاسد کے قافلے کے قصر الوطن پہنچنے پر ان کا باضابطہ استقبال کیا گیا۔ الشیخ محمد بن زاہد بشارالاسد کے ہمراہ پلیٹ فارم آف آنر پر پہنچے جہاں شام کا قومی ترانہ بجایا گیا۔ اس موقعے پر شامی صدر کو اکیس توپوں کی سلامی دی گئی۔ بعد میں دونوں رہنماؤں نے ملاقات کی جس میں شام اور خطے میں استحکام اور ترقی کو فروغ دینے والے امور پر تعاون اور ہم آہنگی کو مضبوط بنانے پر تبادلہ خیال کیا گیا۔ الشیخ محمد بن زاہد نے کہا کہ ہم نے دو برادر ممالک اور عوام کے مفاد کے لیے برادرانہ تعلقات کی حمایت اور فروغ کے لیے مثبت اور تعمیری بات چیت کی۔
