Raza Musani 
کابل : افغان طالبان نے پاکستان پر سرحد پار حملے کرنیوالے 200 عسکریت پسندوں کو گرفتار کرنے کا دعویٰ کردیا۔ وائس آف امریکا کے مطابق طالبان نے کالعدم تحریک طالبان پاکستان کے خلاف کارروائیوں کی تفصیلات گزشتہ ہفتے کابل میں پاکستان کے اعلیٰ سطح کے وفد سے شئیر کیں۔ رپورٹ کے مطابق طالبان نے دہشت گردوں کی گرفتاری کے علاوہ دہشت گردانہ سرگرمیوں کی روک تھام کے لیے دیگر ٹھوس اقدامات کیے ہیں۔ ایک طالبان عہدے دار نے نام ظاہر نہ کرنے کی شرط پر وائس آف امریکا کو بتایا کہ طالبان نےچترال پر حملے سے واپس آنے والے ٹی ٹی پی کے 200 ارکان کو گرفتار کر لیا ہے اور وہ اب جیل میں ہیں۔ دو ہفتے قبل چترال میں پاکستانی چیک پوسٹ پر حملے میں چار فوجی جاں بحق اور 12 حملہ آور ہلاک ہوئے تھے۔ اہلکار نے کہا کہ ہمیں کسی نتیجے پر پہنچنے سے پہلے انتظار کرنا ہوگا اور ان اقدامات کے نتائج کو دیکھنا ہوگا۔ آپ کو ان اقدامات کو مستحکم کرنے کے لیے انہیں کچھ وقت دینا ہوگا۔
