ایران کیخلاف کارروائی زیر غور، امریکا آزمانا چاہتا ہے تو تیار پائے گا، عراقچی

تہران : ایران اور امریکا کے درمیان کشیدگی اپنی انتہا کو پہنچ گئی ہے۔ امریکا کی حملے کی واضح دھمکی پر ایران نے بھرپور جواب سے خبردار کیا ہے۔ وائٹ ہاؤس کی پریس سیکریٹری کیرولین لیویٹ نے کہا کہ سفارت کاری امریکا کی ہمیشہ پہلی ترجیح ہے، تاہم ایران کیخلاف فوجی کارروائی بھی زیر غور متعدد آپشنز میں شامل ہے۔ صدر ٹرمپ تمام آپشنز میز پر رکھتے ہیں ۔ ادھر امریکا نے ایران میں اپنے شہریوں کو ایران سے نکل جانے کی ہدایت کی ہے۔
ایرانی وزیر خارجہ عباس عراقچی نے امریکا کو خبردار کیا ہے کہ اگر واشنگٹن ایران کو آزمانا چاہتا ہے تو اسے جنگ کے لیے تیار پائے گا۔ انہوں نے واضح کیا کہ ایران تمام آپشنز کے لیے تیار ہے اور اس وقت اس کی فوجی تیاری گزشتہ سال کی بارہ روزہ جنگ کے مقابلے میں کہیں زیادہ وسیع ہے۔ ایرانی وزیر خارجہ کے مطابق کسی بھی جارحیت کا بھرپور جواب دیا جائے گا۔