Raza Musani 
نجف : مولود کعبہ امیرالمومنین حضرت علی بن ابیطالب علیہ السلام کے یوم ولادت باسعادت کے موقع پر نجف اشرف میں زائرین کا اژدھام امڈ آیا۔ ملک اور بیرون ملک سے آنے والے لاکھوں زائرین کا روضہ امیر المومنین پر تانتا بندھا ہوا ہے ۔ جابجا لگے موکب بھی زائرین کی پذیرائی کرتے نظر آ رہے ہیں۔ لوگوں میں مٹھائی اور دیگر تبرکات تقسیم کئے جارہے ہیں۔ نجف اشرف میں لاکھوں زائرین کے پیش نظر خاص سیکیورٹی پلان تیار کیا گیا ہے اور ہر قسم کے ناخوشگوار واقعے سے بچنے کے لئے سیکیورٹی اہلکاروں کو مستعد کر دیا گیا ہے، جگہ جگہ چیک پوسٹیں لگائی گئی ہیں ۔عراق کے دیگر مقدس شہروں کربلائے معلیٰ، کاظمین شریفین اور سامرہ میں بھی عظیم الشان جشن اور محفل میلاد کا اہتمام کیا گیا ہے جہاں لاکھوں کی تعداد میں ملکی و غیر ملکی زائرین مولود کعبہ، حضرت علی بن ابیطاب علیہ السلام کا جشن ولادت منا رہے ہیں اور ذاکرین و شعرائے کرام بارگاہ علوی میں اپنے اپنے انداز میں خراج عقیدت پیش کر رہے ہیں۔
