Raza Musani 
لاہور : مجلس وحدت مسلمین کی رکن اسمبلی سیدہ زہرا نقوی نے ٹریفک قوانین کو تعلیمی نصاب میں شامل کرنے کی قرارداد پنجاب اسمبلی میں جمع کرا دی۔ قرارداد میں مطالبہ کیا گیا ہے کہ اسکولوں کےنصاب میں ٹریفک قوانین کو شامل کیا جائے اور بچوں کو ٹریفک قوانین سے متعلق آگاہی کیساتھ ساتھ ان کی عملی طور پر بھی تربیت کی جائے۔ سیدہ زہرا نقوی نے کہا کہ اگر ہم اپنی سڑکوں کو محفوظ بنا لیں تو قیمتی جانوں کے ضیاع سے بچا جا سکے گا۔ قرارداد میں کہا گیا ہے کہ صوبے میں بڑھتے ہوئے حادثات ٹریفک قوانین سے لاعلمی کا نتیجہ ہیں،ملک میں ٹریفک حادثات میں سالانہ 35 سے 40 ہزار افراد جاں بحق جبکہ لاکھوں افراد معذور ہو جاتے ہیں۔ پنجاب میں روزانہ اوسطاً 750 حادثات رونما ہوتے ہیں، جن میں سے روزانہ 9 افراد اپنی جان کی بازی ہار جاتے ہیں۔ انہوں نے کہا کہ سڑکوں کو محفوظ بنانے کیلئے ٹریفک قوانین سے آگاہی وقت کی اہم ضرورت ہے، ٹریفک قوانین کی پابندی کو بچوں کی زندگی میں راسخ کرنا ہو گا، اسکولوں میں بچوں کو ٹریفک قوانین سے متعلق آگاہی کے ساتھ ساتھ ان کی عملی طور پر بھی تربیت کی جائے.
