سرمائی طوفان سے فلسطینیوں کی مشکلات میں خطرناک اضافہ

غزہ : سخت سرد موسم اور طاقتور سرمائی طوفان نے غزہ میں بے گھر فلسطینیوں کی مشکلات میں خطرناک اضافہ کر دیا ہے۔
فلسطین میں بارش، تیز ہواؤں اور سردی سے غزہ میں انسانی بحران شدت اختیار کرگیا ہے۔ نشیبی علاقوں میں قائم بے گھر خاندانوں کے خیمے پانی میں ڈوب گئے جبکہ کئی خیمے تیز ہواؤں سے اکھڑ گئے۔ متاثرہ خاندان، جن میں بچے بھی شامل ہیں، شدید سردی میں کھلے آسمان تلے پناہ لینے پر مجبور ہو گئے۔ بے گھر فلسطینی باریک نائیلون یا کپڑے کے خیموں میں رہ رہے ہیں جو بارش اور طوفان سے کوئی مؤثر تحفظ فراہم نہیں کرتے۔ گھروں کی وسیع تباہی اور تعمیراتی سامان و تیار شدہ گھروں کی آمد پر پابندیوں کے باعث کئی خاندان تباہ شدہ اور غیر محفوظ عمارتوں میں پناہ لینے پر مجبور ہیں۔