Raza Musani 
واشنگٹن : امریکا نے غزہ کو اسمارٹ سٹی اور لگژری سیاحتی مرکز بنانے کیلئے ایک سو بارہ ارب ڈالر کا دس سالہ منصوبہ تیار کرلیا۔
امریکی اخبار نیویارک پوسٹ کے مطابق منصوبے کو پروجیکٹ سن رائز کا نام دیا گیا ہے، جسے امریکی صدر کے داماد جیرڈ کشنر۔ ایلچی اسٹیو وِٹکوف اور وائٹ ہاؤس کے دو معاونین نے تیار کیا ہے۔ رپورٹ کے مطابق پاور پوائنٹ کی بتیس سلائیڈز پر مشتمل منصوبے کو ممکنہ سرمایہ کار ممالک کو پیش کیا جا رہا ہے۔ منصوبے میں مرحلہ وار تعمیرِ نو شامل ہے، جس میں لگژری ہوٹل، تیز رفتار ریل اور مصنوعی ذہانت پر مبنی انفراسٹرکچر غزہ کے بحیرۂ روم کے ساحل پر تعمیر کیا جانا ہے۔امریکا کی جانب سے ساٹھ ارب ڈالر تک کی گرانٹس اور قرضہ جاتی ضمانتوں کے ذریعے نجی سرمایہ کاری کو سہارا دینے کی تجویز دی گئی ہے۔ تاہم منصوبے میں یہ وضاحت نہیں کی گئی کہ تعمیر کے دوران غزہ کے تقریباً بیس لاکھ رہائشیوں کو کہاں رکھا جائے گا۔
