Raza Musani 
اسلام آباد :پاکستان اور ازبکستان کے درمیان ریلوے ‘سیکیورٹی‘ترجیحی تجارتی معاہدے‘موسمیاتی تبدیلی سمیت 8 مفاہمت کی یادداشتوں پر دستخط کئے گئے ہیں جبکہ دونوں ممالک نے معیشت ، تجارت ، سائنس و ٹیکنالوجی ، ثقافت ، تعلیم ، سیکیورٹی ، دفاع اور علاقائی تعاون کی ترقی سمیت مختلف شعبوں میں تزویراتی شراکت داری کو مزید وسعت دینے ، اسلاموفوبیا کے بڑھتے ہوئے رحجان پر گہری تشویش کا اظہار اور افغانستان کو انسانی امداد کی فراہمی جاری رکھنے پر اتفاق کیا ہے۔ازبکستان کے صدر شوکت مرزا یوف کی وزیراعظم عمران خان سے ملاقات کے بعد مشترکہ اعلامیہ بھی جاری کردیاگیا۔ عمران خان نے وزیراعظم ہائوس میں ازبک صدر شوکت مرزایوف کے ساتھ ون آن ون ملاقات اور وفود کی سطح پر مذاکرات کے بعد مشترکہ پریس کانفرنس سے خطاب کرتے ہوئے کہا کہ گزشتہ ایک سال میں پاکستان اور ازبکستان کے مابین تجارت میں 50فیصد جبکہ مشترکہ منصوبوں میں پانچ گنا اضافہ ہوا ہے۔ وزیراعظم نے کہا کہ ہم نے ازبکستان کے ساتھ افغانستان کے راستے روابط بڑھانے کا فیصلہ کیا ہے‘اس سے دونوں ملکوں کے مابین سیاحت اور تجارت میں اضافہ ہو گا۔
