غزہ میں 700 خاندان مکمل طور پر ختم ہو گئے، صیہونی درندگی میں 40139 فلسطینی شہید

غزہ: فلسطینیوں کی نسل کشی میں اسرائیلی فوج اب تک سات سو خاندانوں کو مکمل طور پر ختم کرچکی ہے۔ غزہ میں وزارت صحت نے کہا ہے کہ سات اکتوبر سے جاری صیہونی درندگی میں اب تک 40,139 فلسطینی شہید اور 92,743 زخمی ہوچکے ہیں۔ چالیس نہتے اور معصوم شہری گزشتہ چوبیس گھنٹوں میں شہید ہوئے ہیں۔ اس سفاکی میں اب تک سات سو کنبے مکمل طور پر ختم کئے جا چکے ہیں۔ خان یونس میں شروع کیے گئے اسرائیلی فوج کے نئے زمینی آپریشن میں دیرالبلاح میں دو حملوں میں مزید دو خاندان صفحہ ہستی سے مٹ گئے ہیں۔ اسرائیلی فوج نے دیرالبلاح میں بھی تباہی کا نیا سلسلہ شروع کردیا ہے۔ غزہ جنگ میں قدرے محفوظ سمجھے جانے والے شہر میں اسرائیلی فوج کی زمینی کارروائیاں تیزی سے جاری ہیں جہاں اسرائیلی فوج نے نقل مکانی کرنے والے کئی خاندانوں پر فائرنگ کی ہے جس سے مزید چھتیس فلسطینی شہید ہوگئے ہیں۔