Raza Musani 
غزہ : غزہ میں سرمائی طوفان کے باعث بمباری سے تباہ شادی ہال ۔ مکانات اور دیواریں گرنے سے تین بچوں سمیت دس فلسطینی شہید اور درجنوں زخمی ہوگئے۔ جبکہ سردی کی وجہ سے بھی دو بچے دم توڑ گئے۔
غزہ سٹی میں سب سے افسوسناک واقعہ پیش آیا جہاں بمباری سے تباہ شادی ہال کا ایک حصہ گرگیا۔ شادی ہال میں بےگھر متاثرین نے پناہ لے رکھی تھی۔ حادثے میں ایک بچی سمیت پانچ فلسطینی شہید ہوگئے۔ شمالی غزہ میں دیوار گرنے سے خاتون جبکہ غزہ سٹی میں مسجد کا مینار گرنے سے نوجوان شہید ہوا۔ تین افراد دیگر علاقوں میں شہید ہوئے۔
محکمہ صحت کے مطابق شدید سردی کے باعث مزید دو بچے بھی جاں بحق ہو گئے، جس کے بعد تعداد چھ ہو گئی۔ ادھرانسانی حقوق کے ہائی کمیشن کے ڈائریکٹر اجیت سونگائی نے کہا کہ سردی قاتل عنصر بن چکی ہے۔ جو گزشتہ دو سال سے جاری بمباری اور زبردستی بیدخلی کے ساتھ مل کر جانوں کے لیے مہلک ہے۔ درجہ حرارت میں کمی کی وجہ سے بچوں کی ہلاکتیں ہو چکی ہیں.
