کچھ ضروری باتیں

بچو ہمیں اپنی صحت کا خاص خیال رکھنا چاہیے ، صحت جسم کے علاوہ ہماری روح کو بھی تسکین دیتی ہے۔صحت مند اور طاقتور انسان سختیوں کا صبر اور حوصلے کے ساتھ مقابلہ کرسکتا ہے۔ وہ بہت کم زندگی کے نشیب و فراز سے مایوس ہوتا ہے۔
گزشتہ زمانوں میں انسان کے وسائل کم تھے اور انسان زمین کی کھدائی، لکڑی کاٹنا، شکار اور روایتی کھیتی باری جیسے زیادہ محنت طلب کام کرنے سے چست و چالاک رہتا تھا۔ ان دنوں میں آج کی طرح ڈاکٹروں ،طبیبوں ، حکیموں اور شفاخانوں کی بھرمار نہ تھی کیونکہ متحرک جسم کی وجہ سے لوگ کم بیمار ہوتے تھے۔
اب انسان پیدل چلنا پسند نہیں کرتا وہ گاڑی سے سفر کرتا ہے ۔ لکڑی کاٹنے کی بھی زیادہ ضرورت نہیں رہی کیونکہ تیل اور گیس نے انسان کی ضرورت پوری کردی ہے یہاں تک کہ اترنے چڑھنے کے لئے سیڑھی کے بجائے لفٹ کا استعمال ہوتا ہے۔ غرضیکہ انسان بہت آرم طلب ہوگیا ہے، اس کے ساتھ ساتھ اس کے جسم میں بھی وہ چستی نہیں رہی ، وہ یا تو بہت کمزور اور سست ہوگیا ہے یا حد سے زیادہ موٹا، اسی لئے بیماریاں جلد اس پر حملہ آور ہوتی ہیں۔
لیکن ساتھیو ، مایوس نہ ہوں ، آپ جہاز ، گاڑی، لفٹ، میز، کرسی ، بجلی ، گیس وغیرہ وسائل سے استفادہ کرتے ہوئے بھی تندرست اور سلامتی حاصل کر سکتے ہیں اس کے لئے آپ کو ورزش کرنا پڑے گی۔ ورزش سے آپ ہشاش بشاش صحیح اور سالم رہ سکتے ہیں ۔
لیکن یاد رکھیں ورزش کے لئے باقاعدہ قواعد و ضوابط ہوتے ہیں بے موقع کی ورزش نہ صرف انسان کے لئے کوئی فائدہ نہیں پہنچاتی بلکہ زیادہ نقصان دہ بھی ہے۔ مثلاً کہتے ہیں کہ جتنا ہو سکے پانی پئیں لیکن پانی پینے کا بہترین وقت کھانا کھانے یا ورزش کرنے کے ایک دو گھنٹے بعد کا ہے نیز کھانا کھانے سے کم از کم تین گھنٹے تک سخت قسم کی ورزشوں سے اجتناب کرنا چاہیے بلکہ ورزش کے بعد آرام کرنے کی کوشش کریں اور ورزش کے ایک گھنٹہ بعد تک سخت کام کرنے سے پرہیز کریں۔