قاسم سلیمانی کی شہادت نے ایرانی قوم میں امریکا کے خلاف نفرت کو تازہ کر دیا،جماعت اسلامی

امریکی رعب و دبدبہ ختم ہوگیا ہے، اب اسے ہر جگہ رسوائی ملے گی
مشہد(نیوز ڈیسک) نائب امیر جماعت اسلامی پاکستان اور ملی یکجہتی کونسل کے سیکریٹری جنرل لیاقت بلوچ نے مشہد میں پاکستانی طلبہ اور علما کے استقبالیہ سے خطاب میں کہا کہ بیرون ملک پاکستانی نوجوان و طلبہ پاکستان کے سفیر ہیں، ایران میں تعلیم حاصل کرنے والے طلبہ اپنے اندر اسلامی انقلابی روح پیدا کریں، تعصبات، عدم برداشت اور ہر نوعیت کی شدت کے بت توڑ دیں، امریکی استعمار اور اس کے حواریوں نے ہمیں عرب و عجم، شیعہ و سنی کی حقیقت کو ہماری بے عملی اور اسلام کے انقلابی پیغام سے دور ہونے کی وجہ سے تقسیم در تقسیم کر دیا ہے، ہم انجانے زہر کے پیالے پی رہے ہیں لیاقت بلوچ نے کہاکہ ایران میں اسلامی انقلاب کو 41 سال ہوگئے، پوری دنیا کی جانب سے مسلط ظلم اور رکاوٹ کو ایرانی قیادت پوری قوم کو متحد کرنے کا ذریعہ بنا دیتی ہے، جنرل قاسم سلیمانی کی شہادت نے ایرانی قوم میں امریکا کے خلاف نفرت کو تازہ کر دیا ہے، ٹرمپ نے غلطی کی ہے، امریکی رعب و دبدبہ ختم ہوگیا ہے، اب اسے ہر جگہ رسوائی ملے گی۔