تحفظ عزا کیلئے پنجاب میں بھی احتجاج کا الٹی میٹم

 عزاداری کیخلاف مقدمات مضحکہ خیز ہیں ، حکومت پنجاب مقدمات ختم کرے ورنہ سندھ سے زیادہ سخت احتجاج پنجاب کی سڑکوں پر ہوگا، علامہ سبطین سبزواری
حکمران ہوش کے ناخن لیں، عزاداری کو محدود کرنے کے زعم سے باہر نکلیں، ہم نے احتجاج کا راستہ اختیار کیا تو حکومت کیلئے مشکلات پیدا ہوں گی
لاہور (نیوز ڈیسک) شیعہ علما کونسل نے مجالس عزا ، مشی اور جلوسوں کے شرکا پر مقدمات ختم کرانے کیلئے پنجاب حکومت کو الٹی میٹم دے دیا، کونسل کے شمالی پنجاب کے صدر علامہ سید سبطین حیدر سبزواری نے کہا کہ عزاداری کیخلاف جو ایف آئی آرز درج کی گئی ہیں وہ مضحکہ خیز اور قابل مذمت ہیں ، حکومت پنجاب کو متنبہ کرتے ہیں کہ عزاداران امام حسین کے نام فورتھ شیڈول سے نکالے اور مقدمات ختم کرنے کا اعلان کرے، ورنہ سندھ سے زیادہ سخت احتجاج پنجاب کی سڑکوں پر ہوگا، حکمران ہوش کے ناخن لیں، عزاداری کو محدود کرنے کے زعم سے باہر نکلیں، ہمیں احتجاج پر مجبور نہ کیا جائے، ہم نے احتجاج کا راستہ اختیار کیا تو حکومت کیلئے مشکلات پیدا ہوں گی،ہمارا مطالبہ ہے کہ فورتھ شیڈول کو شریف شہریوں کی بجائے، تکفیری دہشت گردوں اور ریاست دشمن عناصر کیخلاف استعمال کیا جائے،انہوں نے سندھ میں تحفظ عزاداری لانگ مارچ کی کامیابی پر صوبائی صدر علامہ سید ناظر عباس تقوی کو مبارک باد دی