بدمعاش کی پابندیاں نہ ماننااخلاقی ضرورت ہے، ایران

عالمی برادری امریکی پابندیوں پر محض تماشائی نہ رہے، جواد ظریف
تہران(نیوز ڈیسک) ایرانی وزیر خارجہ محمد جواد ظریف نے موجودہ صورتحال میں امریکی پابندیوں پر عمل نہ کرنے کو اخلاقی ضرورت قرار دیا اور عالمی برادری سے اپیل کی کہ وہ ایران کے خلاف امریکی پابندیوں پر محض تماشائی نہ بنے، جواد ظریف نے کہا کہ ایسے وقت میں جب امریکا جیسے بڑے اقتصادی ملک کو بھی کورونا وائرس کے مقابلہ میں عالمی امداد کی ضرورت پڑ گئی ہے، عالمی برادری کو چاہیے کہ وہ ایران کے خلاف واشنگٹن کی پابندیوں پر محض تماشائی نہ رہے۔
ایران کے وزیر خارجہ کا کہنا تھا کہ دنیا کی بڑی بڑی معیشتیں بھی کورونا کی وسعت کو دیکھتے ہوئے دوسروں کی مدد کی محتاج ہیں لیکن اس کے باوجود امریکا ایران کے خلاف اقتصادی دہشت گردی کا سلسلہ روکنے پر تیار نہیں۔، ایک بد معاش کی عائد کردہ پابندیوں کو خاطر میں نہ لانا اخلاقی ضرورت ہے۔