Raza Musani 
واشنگٹن : امریکا نے 20 سال بعد بگرام اڈا خالی کرکے افغان فورسز کے حوالے کردیا، امریکی دفاعی حکام کے کہنا ہے کہ امریکا اور نیٹو کے آخری فوجی دستوں نے افغانستان کی بگرام ایئر بیس کو خالی کر دیا ہے جو گزشتہ 20 سال سے عسکریت پسندوں کے خلاف جنگ کا مرکز تھا،ترجمان افغان وزارت دفاع نے بھی بگرام ایئربیس سے اتحادی افواج کے انخلا کی تصدیق کرتے ہوئے کہا کہ بگرام ایئر بیس کا کنٹرول باضابطہ طور پر افغان فورسز کے حوالے کردیا گیا ہے، افغان فوج اب بگرام ایئربیس دہشتگردی کیخلاف جنگ کیلئے استعمال کرے گی بگرام علامتی طور پر بھی اور اسٹرٹیجک اعتبار سے بھی اہم ہے، بگرام کی منتقلی کی باضابطہ تقریب آج متوقع ہے، 650کے قریب امریکی فوجی متوقع طور پر افغانستان میں ہی رہیں گے تاکہ سفارت کاروں کو تحفظ فراہم کیا جا سکے اور کابل کے بین الاقوامی ہوائی اڈے کی حفاظت میں مدد دی جا سکے،ایئرپورٹ کی حفاظت پر ان کے ساتھ امریکا کے نیٹو اتحادی ترکی کے فوجی بھی ہیں اور افغان حکومت کے ساتھ اس کی سیکیورٹی کے ایک نئے معاہدے پر کام جاری ہے، وائٹ ہائوس کی ترجمان جین ساکی نے کہا ہے کہ افغانستان سے امریکی افواج کا مکمل انخلا آئندہ دنوں میں نہیں، آئندہ ماہ اگست میں ہوگا۔
