ویانا میں سمجھوتہ نہیں ہوا،تمام پابندیاں ختم کرنا ضروری

جب تک تمام شرائط پر اتفاق رائے نہیں ہوجاتا اس وقت تک کسی سمجھوتے کا امکان نہیں ،ابتدائی سمجھوتے کی خبریں درست نہیں ،ترجمان ایرانی وزارت خارجہ
پابندیوں کا سو فیصد خاتمہ نہیں ہوا تو کسی پابندی کو ختم نہیں سمجھا جائے گا،پابندیاں ختم ہوتے ہی جوہری وعدوں پر دوبارہ عمل کرنا شروع کردینگے ،ایرانی ارکان
تہران(نیوز ڈیسک)ایرانی وزارت خارجہ کے ترجمان سعید خطیب زادے نے ویانا مذاکرات کے دوران ابتدائی اتفاق رائے سے متعلق خبروں کو مسترد کردیا اور کہاکہ ایران اور چار جمع ایک کے درمیان ابتدائی سمجھوتہ نام کی کوئی چیز موجود نہیں ،انہوں نے واضح کیا کہ جب تک تمام شرائط پر اتفاق رائے نہیں ہوجاتا اس وقت تک کسی سمجھوتے کا امکان نہیں ، انہوں نے کہا کہ ویانا مذاکرات کے دوران بہت سے معاملات پر اتفاق رائے ہوگیا ہے مگر تھوڑے بہت معاملات باقی ہیں جن پر اتفاق رائے کے لیے سیاسی فیصلوں کی ضرورت ہے،، ایران اور آئی اے ای اے کے درمیان سمجھوتہ،پارلیمنٹ کے منظور کردہ بل کے مطابق ہے اور یہ بل لازم الاجرا ہے،ادھر پارلیمنٹ کے دو سو سے زائد اراکین نے بیان جاری کرکے تہران کے خلاف تمام پابندیوں کے بیک وقت خاتمے کی ضرورت پر زور دیا ہے ، اراکین نے ایک بیان میں زور دے کر کہا کہ ایران تمام پابندیوں کے خاتمے اور عملی طور پر اس پر یقین ہوجانے کے بعد ہی اپنے جوہری وعدوں پر دوبارہ عمل کرنا شروع کرے گا اور یہ ایران کا دو ٹوک موقف اور بنیادی شرط ہے کہ جس کا بارہا اعلان کیا جاتا رہا ہے ، ایران اور ایٹمی معاہدے کے کسی بھی فریق ملک کے درمیان گفتگو کے کسی بھی قسم کے نتیجے کو اسی صورت میں قبول کیا جائے گا کہ جب اس گفتگو اور مذاکرات کے نتیجے میں ایرانی عوام کو کوئی فائدہ پہنچے گا اور وہ گفتگو ایرانی عوام کے اقتصاد و معیشت کے مفاد میں ہو، پارلیمنٹ کسی بھی ایسی تقسیم کو قبول نہیں کرے گی کہ جس کی بنیاد پر بعض پابندیاں ختم اور بعض کو باقی رکھ کر ایرانی عوام پر اقتصادی دباوَ ڈالنے کی کوشش جاری رکھی جا ئے اور یا ان پابندیوں کے ذریعے ایرانی عوام کے اقتصاد کو نقصان پہنچایا جا سکے، اگر پابندیوں کا سو فیصد خاتمہ نہیں کیا گیا تو کسی بھی پابندی کو ختم نہیں سمجھا جائے گا