قرآ ن مجید پوری دنیا اور عالم بشریت کے لئے ہدایت ہے،ولی امر مسلمین

امریکا حق بات کو قبول نہیں کرنا چاہتا ہے اور مذاکرات کے ذریعہ ایران کا وقت ضائع کرنے کی کوشش کررہا ہے، وقت امریکا کے ہاتھ سے نکلتا جارہا ہے
 پہلے پابندیاں ختم کی جائیں اسکے بعد ہم وعدوں پر عمل کریں گے،یورپی ممالک ایران کی تائید کرتے ہیں لیکن امریکی منہ زوری پر بے بس ہوجاتے ہیں
تہران (نیوز ڈیسک) ولی امر مسلمین آیت اللہ سیدعلی خامنہ ای نے ایٹمی سمجھوتے کو برقرار رکھنے کی امریکی تجاویز کو یکسر مسترد کرتے ہوئے کہا ہے کہ یہ تجاویز تو ایک نظر ڈالنے کے بھی قابل نہیں ، امریکی بالعموم توہین آمیز اور تکبرانہ انداز میں پیش کش کرتے ہیں ، وہ دیکھنے کے بھی قابل نہیں ہوتی ہیں، انہوں نے امریکا کو نکتہ چینی کا نشانہ بناتے ہوئے کہا کہ وقت اس کے ہاتھ سے نکلتا جارہا ہے ، مذاکرات کو تخریبی نہیں بننا چاہیے، امریکا حق بات کو قبول نہیں کرنا چاہتا ہے اور مذاکرات کے ذریعہ ایران کا وقت ضائع کرنے کی کوشش کررہا ہے،انہوں نے واضح طور پر کہا کہ مذاکرات ایسے نہیں ہونے چاہئیں کہ وہ طول پکڑیں اور ان میں فریقوں کوالجھا دیا جائے، یہ عمل ملک کے لیے نقصان دہ ہے،انہوں نے دوٹوک الفاظ میں کہا ہے کہ پہلے ایران مخالف پابندیاں ختم کی جائیں اس کے بعد ہم اپنے وعدوں پر عمل کریں گے،انہوں نے کہاکہ یورپی ممالک خصوصی اجلاس میں ایران کے بر حق ہونے کی تائید کرتے ہیں لیکن امریکاکی منہ زوری کے سامنے وہ بھی بے بس ہوجاتے ہیں ،انہوں نے قرآنی تعلیمات سے متعلق کہا کہ قرآن مجید کی ہدایات کسی خاص علاقہ یا خطہ اور کسی خاص قوم اور قبیلہ کے لئے نہیں بلکہ قرآ ن مجید کی ہدایات پوری دنیا اور عالم بشریت کے لئے ہیں ، قرآن انسان کے لئے بہترین ہادی اور رہنما ہے کیونکہ یہ اللہ کی کتاب ہے اور اللہ نے ہی انسان کو بھی پیدا کیا ہے