انصار اللہ کا بحریہ احمر میں اسرائیلی جہازوں پر حملے جاری رکھنے کا اعلان

صنعا: یمن کی قومی نجات حکومت نے کہاہے کہ بحیرۂ احمر میں اسرائیلی جہازوں کے علاوہ تمام جہازوں کے لئے امن ہے۔ نائب وزير خارجہ حسین العزی نے کہاہے کہ صنعاء یقینی طور پر بحیرہ احمر میں جہاز رانی کی حفاظت کے بارے میں دوسروں کے مقابلے میں زیادہ فکر مند ہے اور دوسروں کے مفادات کا سب سے زيادہ احترام کرتا ہے اور ہم نے ماضی میں یہ ثابت کیا ہے۔ انہوں نے مزید کہا کہ بحیرہ احمر، مجرم صیہونی حکومت کے جہازوں کے علاوہ تمام ممالک کے جہازوں کے لئے پرامن اور محفوظ جگہ ہے۔ العزی نے مزید کہا کہ صیہونی حکومت کے لیے یہ عدم تحفظ اس وقت تک جاری رہے گا جب تک وہ غزہ میں بچوں اور معصوم شہریوں پر تشدد ختم نہیں کر دیتی۔
صیہونی حکومت کی سلامتی کونسل کے سابق سربراہ نے کہا کہ یمن کا جغرافیائی محل وقوع اس کے میزائلوں سے زیادہ خطرناک اور صیہونی حکومت کے لیے اسٹریٹجک خطرہ ہے۔ یمن کی نیشنل سالویشن گورنمنٹ برائے دفاع اور سلامتی کے امور کے نائب وزیر اعظم جلال الرویشان نے بھی کہا کہ جنگ بندی کا تعلق غزہ سے ہے، اور مسلح افواج کے ترجمان نے بھی اعلان کیا ہے کہ دشمن پر ہمارا بحیرۂ احمر بند کرنے کا فیصلہ، اپنی جگہ قائم ہے۔