خلیج عدن میں یمن کا میزائل حملہ، امریکی آئل ٹینکر کو نقصان

صنعا : بحیرہ احمر کی لڑائی بحیرہ عرب تک پھیل گئی ہے۔ یمنی فوج نے جبوتی کے قریب ایک اور بحری جہاز کو میزائل سے نشانہ بنادیا۔ دھماکوں سے جہاز کو نقصان پہنچا۔ اس سے قبل خلیج عدن میں میزائل حملے میں امریکی آئل ٹینکر ٹورم تھور کو شدید نقصان پہنچا اور اس سے تیل سمندر میں پھیلنا شروع ہوگیا۔ یمنی فوج کے ترجمان یحییٰ سریع نے دعویٰ کیا ہےکہ کئی ڈرونز کے ذریعے امریکی بحری جہازوں پر حملہ کیا گیا۔
یمنی فوج کے حملوں کے بعد امریکی اور برطانوی افواج نے یمن میں ایک درجن سے زیادہ اہداف پر حملے کئے۔ زیر زمین ہتھیاروں اور میزائلوں کے ذخیرہ کرنے کی سہولیات، فضائی دفاعی نظام، ریڈار اور ایک ہیلی کاپٹر کو نشانہ بنایا گیا۔ امریکی وزیر دفاع لائیڈ آسٹن نے خبردار کیا ہے کہ اگر یمنی فوج نے بحیرہ احمر میں حملے بند نہیں کیے تو انہیں نتائج بھگتنا ہوں گے۔ جہاز رانی کے تحفظ کیلئے امریکا کارروائی سے دریغ نہیں کرے گا۔