Raza Musani 
تہران: ولی امر مسلمین آیت اللہ خامنہ ای نے بحیرہ احمر میں یمنیوں کی اسرائیل مخالف بحری کارروائیوں کو سراہتے ہوئے کہا ہے کہ انہوں نے امریکی دھمکیوں کے باوجود عظیم کام کیا ہے۔ آئمہ جمعہ سے خطاب میں ولی امر مسلمین نے کہاکہ یمن کے لوگوں نے صیہونی حکومت کی حیاتی شریانوں پر وار کردیا اور وہ امریکی دھمکی سے نہیں ڈرے کیونکہ اللہ سے ڈرنے والا انسان کسی دوسرے سے نہیں ڈرتا اور ان کا یہ کام واقعی اللہ کی راہ میں جہاد کا مصداق ہے۔ فلسطینی عوام کی حمایت میں یمنی سمندری مہم تعریف اور تحسین کی مستحق ہے۔ انہوں نے کہاکہ خداوند عالم کی مرضی سے یہ مجاہدت، استقامت اور جدوجہد، فتح تک جاری رہے گی اور اللہ تعالیٰ ان سبھی کو اپنی مدد و نصرت عطا کرے گا جو اس کی مرضی کی راہ میں قدم بڑھا رہے ہیں۔ رہبر معظم نے یہ بھی کہا کہ دنیا کے لوگ تسلیم کرتے ہیں کہ غزہ کے لوگ مظلوم اور فاتح ہیں جب کہ غاصب حکومت ظالم اور خونخوار کے ساتھ ساتھ شکست خوردہ اور بکھری ہوئی ہے۔ انھوں نے دنیا کی نظروں میں غزہ کے عوام کی مظلومیت اور ساتھ ہی ان کی فتح کو ان کے صبر اور توکل کا پھل اور برکت بتایا اور کہا کہ اس کے مقابلے میں آج دنیا میں کوئی بھی جنگ میں غاصب اور خبیث صیہونی حکومت کی فتح کو تسلیم نہیں کرتا اور دنیا بھر کے لوگوں اور سیاستدانوں کی نظر میں یہ حکومت، ظالم، بے رحم، بھیڑیا صفت، شکست خوردہ اور تباہ ہونے والی ہے۔
