Raza Musani 
جنیوا: اقوام متحدہ کے عالمی غذائی پروگرام (ڈبلیو ایف پی) نے کہا ہےکہ جنگ بندی کے بعد دس لاکھ افراد تک خوراک پہنچائی ہے لیکن مکمل ضرورت پوری کرنا ممکن نہیں۔ جنیوا میں صحافیوں سے بات کرتے ہوئے ورلڈ فوڈ پروگرام کی ترجمان عبیر عطفہ نے بتایا کہ تین ہفتے سے زائد عرصہ گزرنے کے باوجود امدادی رسائی اب بھی محدود ہے اور فی خاندان صرف ایک پیکٹ فراہم کیا جا رہا ہے۔ ترجمان کے مطابق متاثرین کی مکمل ضرورت پوری کرنا اس وقت تک ممکن نہیں جب تک مزید راستے اور بارڈر کھولے نہ جائیں۔ عبیر عطفہ نے بتایا کہ جنگ بندی کے دوران بیس ہزار میٹرک ٹن خوراک داخل کی گئی جو مطلوبہ مقدار کا صرف نصف ہے۔ انہوں نے واضح کیا کہ شمالی غزہ تک رسائی اب بھی مشکل ہے اور تباہ شدہ سڑکوں کے باعث قافلوں کو طویل راستے اختیار کرنا پڑ رہے ہیں۔
