اسرائیل کی حمایت کرنے والے مغربی ممالک کو انصاف کے کٹہرے میں لانا ضروری ہے، ایران

جنیوا : جنیوا میں اقوام متحدہ کے ادارے میں ایرانی سفارت کار نائب مہدی العبادی نے کہا ہے فلسطین میں نسل کشی اور جنگی جرائم میں اسرائیل کی حمایت کرنے والے مغربی ممالک کو انصاف کے کٹہرے میں لانا ضروری ہے۔ صیہونی حکومت کی جانب سے ایران کے خلاف وسیع پیمانے پر تباہی پھیلانے والے ہتھیار رکھنے کا الزام بے بنیاد اور قابل مذمت قرار دیتے ہوئے کہا ہے کہ اسرائیلی وزیراعظم نے گذشتہ سال ستمبر میں ایران کے خلاف نیوکلئیر ہتھیار استعمال کرنے کی دھمکی دی تھی جو کہ بین الاقوامی قوانین کی کھلی خلاف ورزی ہے۔ انہوں نے کہا کہ صیہونی حکومت گذشتہ سات عشروں سے فلسطینی عوام کے بنیادی حقوق کی خلاف ورزی میں مصروف ہے۔ انہوں نے کہا عالمی برادری کو چاہئے کہ ان مغربی ممالک کا احتساب کرے جو صیہونی حکومت کے جرائم کی حمایت کرتے ہوئے فلسطینوں کے خلاف استعمال کرنے کے لئے اسرائیل کو اسلحہ فراہم کررہے ہیں۔ انہوں نے کہا کہ مغربی ممالک کی حمایت سے ہی اسرائیل غزہ میں فلسطینیوں کے خلاف وحشیانہ حملے کررہا ہے۔