ہمارے پاس جنگ روکنے کا اختیار نہیں ، انتونیو گوتریس

رفح : اقوام متحدہ کے سیکریٹری جنرل انتونیو گوتریس نے رفح کراسنگ کے دورے پر غزہ میں اسرائیلی جارحیت روکنے کا مطالبہ کردیا۔ انتونیو گوتریس نے کہا کہ وہ غزہ کے فلسطینیوں کا درد دنیا کے سامنے لانے کےلیے رفح آئے ہیں۔ غزہ میں پہلے سے کہیں زیادہ اب انسانی امداد کی اشد ضرورت ہے، امدادی سامان کے ٹرکوں کو غزہ کی سرحد پر روکنا اخلاقی کمزوری ہے۔ ان کا کہنا تھا کہ اسرائیل کو انسانی امداد کی رسائی پورے غزہ میں بلا روک ٹوک دینی چاہیے، غزہ میں امداد پہنچانے کے لیے مصر کے ساتھ مل کر کام کرتے رہیں گے۔ انتونیو گوتریس نے کہا کہ وقت آگیا کہ جنگ بندی اور یرغمالیوں کو رہا کیا جائے۔ اب وقت آگیا کہ فلسطینی ریاست قائم کی جائے۔ گوتریس نے کہا کہ رفح میں زمینی آپریشن انسانی تباہی کا سبب بنے گا۔ اتنے لوگوں کو مرتا ہوا اور اتنی اذیتوں میں نہیں دیکھا جاسکتا۔ انتونیو گوتریس کا کہنا تھا کہ ہمارے پاس اختیار نہیں، جن کے پاس ہے ان سے اپیل ہے کہ غزہ جنگ روکی جائے۔