مسجد اقصیٰ اور مسجد ابراہیمی میں داخلے پر پابندی کے نتائج کا انتباہ

رام اللہ : فلسطینی انتظامیہ نے مسجد اقصیٰ میں داخلے پر پابندی اور مسجد ابراہیمی کی خلاف ورزیوں کے سخت نتائج سے خبردار کیا ہے۔ فلسطینی وزارت برائے امور خارجہ اور تارکین وطن نے ماہ رمضان میں مسجد الاقصی اور اس کے اطراف کے علاقوں میں نئی پابندیاں لگانے سے خبردار کیاہے۔ وزارت نے ایک بیان میں کہاکہ اسرائیلی پالیسی شہریوں کی عبادت کی آزادی اور عبادت گاہوں تک رسائی کی آزادی کے حق کی خلاف ورزی ہے۔ یہ اقدام مسجد الاقصیٰ کی تاریخی حیثیت تبدیل کرنے کی کوششوں کا حصہ ہے۔
ادھر فلسطینی وزارت اوقاف اور مذہبی امور نے ہیبرون میں مسجد ابراہیمی کے خلاف اسرائیلی فوج اور آباد کاروں کی بڑھتی ہوئی خلاف ورزیوں سے خبردار کیا ہے۔ وزارت نے ایک بیان میں کہا کہ قابض فوج نے مسجد کے اطراف چوکیوں کی تعداد میں اضافہ کر دیا ہے۔ ایک کے علاوہ اس کے تمام داخلی راستے بند کر دیے ہیں، مسجد تک پہنچنے کی کوشش کرنے والے نمازیوں کی راہ میں مزید رکاوٹیں کھڑی کر کے ان میں خوف کی کیفیت پیدا کر دی ہے۔