امریکا: تعلیمی اداروں میں نفرت انگیز جرائم میں اضافہ

واشنگٹن: حالیہ برسوں میں امریکہ میں نفرت پر مبنی جرائم میں ڈرامائی اضافہ دیکھنے میں آیا ہے۔ ماہرین نے اس بارے میں تشویش کا اظہار کیا ہے۔ فیڈرل بیورو آف انویسٹی گیشن کی رپورٹ سے پتہ چلا ہے کہ 2022 میں امریکہ بھر میں رپورٹ ہونے والے نفرت انگیز جرائم میں سے 10 فی صد تعلیمی اداروں میں ہوئے اور اس طرح تعلیمی ادارے وہ تیسرا بڑا مقام بن گئے ہیں جہاں اس نوعیت کے جرائم ابھر رہے ہیں۔ رپورٹ کے مطابق نفرت پر مبنی سب سے زیادہ جرائم گھروں میں ہوئے جو کل جرائم کا 27 فیصد ہیں۔ 16 فی صد جرائم شاہراہوں، سڑکوں یا گلیوں میں پیش آئے جب کہ نفرت پر مبنی کل جرائم کے 10 فی صد واقعات تعلیمی اداروں میں رپورٹ ہوئے ۔ تعلیمی اداروں سے رپورٹ ہونے والے ان جرائم کی تعداد، اسکول کی ابتدائی سطح سے لے کر یونیورسٹی تک پھیلی ہوئی ہے۔