Raza Musani 
تہران : ترجمان ایرانی وزارتِ خارجہ اسماعیل بقائی کا کہنا ہے کہ امریکا کی نئی سیکیورٹی حکمتِ عملی دراصل اسرائیل کے تحفظ کے لیے تیار کی گئی ہے۔ انہوں نے واضح کیا کہ ایران اور امریکا کے درمیان کوئی براہِ راست رابطہ موجود نہیں۔
تہران میں نیوز بریفنگ کے دوران اسماعیل بقائی نے کہا کہ واشنگٹن کی حکمتِ عملی امریکا کی اپنی نہیں بلکہ مکمل طور پر اسرائیل کی سلامتی کے گرد گھومتی ہے۔ ان کا کہنا تھا کہ امریکا نے ہمیشہ ایران کے داخلی معاملات میں مداخلت کی ہے جس کے نتائج خطے میں عدم استحکام کی صورت میں سامنے آتے ہیں۔ انہوں نے بتایا کہ ایران اور امریکا کے درمیان واحد باضابطہ رابطہ صرف سوئس سفارتخانے کے ذریعے ہوتا ہے اور اس کے علاوہ کوئی چینل موجود نہیں. اسماعیل بقائی نے کہا کہ ایران عالمی ایٹمی توانائی ایجنسی کا رکن ہے اور اسی حیثیت سے ایجنسی کے ساتھ بات چیت جاری رہتی ہے۔ ان کا کہنا تھا کہ تہران اپنے قومی و علاقائی مفادات کے تحفظ کے لیے کسی بھی دباؤ کو قبول نہیں کرے گا ۔ ترجمان نے یہ بھی کہا کہ ایران خطے میں امن کو مضبوط دیکھنا چاہتا ہے مگر بیرونی مداخلتیں اس راستے میں سب سے بڑی رکاوٹ بنی ہوئی ہیں۔
