غزہ میں امداد کی تقسیم کا امریکی منصوبہ مسترد، اسرائیل ناکابندی ختم کرے، چین، روس اور برطانیہ

نیویارک: روس، چین، برطانیہ اور فلسطین نے غزہ میں امداد تقسیم کرنے کے امریکی و اسرائیلی منصوبے کو مسترد کردیا اور اسرائیل پر زور دیا ہے کہ وہ غزہ کی دو ماہ سے جاری ناکہ بندی ختم کرے۔ غزہ میں امداد کی فراہمی کے معاملے پر سلامتی کونسل کا خصوصی اجلاس ہوا۔ اقوام متحدہ کی امدادی تنظیموں نے غزہ کی صورتحال کو انتہائی تشویشناک قرار دیا۔ امدادی ادارے اوچا کے سربراہ ٹام فلیچر نے سلامتی کونسل کو بتایا ہے کہ اسرائیل امداد کو سودے بازی کے ہتھکنڈے کے طور پر استعمال کررہا ہے۔
امریکی سفیر ڈوروتھی شیا نے امدادی گروپوں سے مطالبہ کیا کہ وہ امداد کی تقسیم کے لیے امریکی اسرائیلی منصوبے کی حمایت کریں۔ فلسطینی مندوب ریاض منصور نے کہاہےکہ امداد کی تقسیم کا اسرائیلی منصوبہ امداد کو ہتھیار بنانے کا منصوبہ ہے۔ برطانوی ایلچی باربرا ووڈورڈ نے کہاکہ اسرائیل کو غزہ پر سے اپنی ناکہ بندی ختم کرنی چاہیے۔ روس اور چین کے نمائندوں نے بھی امریکی منصوبے کو مسترد کردیا۔