ایغور مسلمانوں پر جبر کا الزام، امریکی ایوان نمائندگان میں چین مخالف بل منظور

واشنگٹن : امریکی ایوان نمائندگان میں چین مخالف بل منظور ہوگیا۔ ایوانِ نمائندگان نے ایغور آبادی کی جبری مشقت روکنے سے متعلق ایکٹ کو ایک کے مقابلے میں 428 ارکان کی غالب اکثریت سے منظور کیا۔ قانون کا درجہ حاصل کرنے کے لیے اب اس بل کی سینیٹ سے منظوری درکار ہو گی، جس کے بعد صدر جو بائیڈن اس پر دستخط کر کے اسے قانونی حیثیت دیں گے۔ بل میں چین کے ایغور مسلمانوں سے ناروا سلوک کی مذمت اور سنکیانگ سے درآمدات پر پابندی لگانے کی سفارش کی گئی ہے۔اسپیکر کا کہنا ہے کہ چین ایغور اور اقلیتوں کے خلاف جبر کا استعمال کر رہا ہے۔ چین اس بات کو مسترد کرتا ہے کہ سنکیانگ میں بیگار کے ذریعے مصنوعات تیار کی جاتی ہیں، لیکن امریکی حکومت اور انسانی حقوق کے متعدد گروپ یہی کہتے ہیں کہ وہاں پر چین نسل کشی کے ہتھکنڈے استعمال کر رہا ہے۔