جنگ شروع کرنے کا امریکی الزام حقائق کو مسخ کرنا ہے، حماس

دوحہ: حماس نے امریکہ پر الزام عائد کیا ہےکہ وہ تنظیم پر جنگ شروع کرنے کا الزام لگا کر حقائق کو مسخ کر رہا ہے۔ حماس کے بیان میں کہا گیاہے کہ امریکی قومی سلامتی کونسل کے ترجمان برائن ہیوز کا یہ دعویٰ کہ حماس نے یرغمالیوں کو رہا کرنے کے بجائے جنگ کا انتخاب کیا حقائق کو مسخ کرنے کے مترادف ہے۔ حماس نے کہاکہ نیتن یاہو نے ساری کوششوں کو جان بوجھ کر سبوتاژ کیا او اپنے سیاسی مفادات کو پیش نظر رکھتے ہوئے دوبارہ جنگ شروع کر دی۔ حماس نے کہا کہ امریکہ جارح کو مظلوم کے برابر قرار دیتا ہے۔ امریکہ کے بیانات سے ایک بارپھر اس کی جارحیت میں مکمل شراکت کے ساتھ ساتھ غزہ میں بیس لاکھ سے زائد فلسطینیوں کے خلاف نسل کشی، فاقہ کشی اور محاصرہ کرنے میں اسرائیل کے ساتھ ملی بھگت کا پتہ چلتا ہے۔