Raza Musani 
اسلام آباد : امریکا اور چین نے پاکستان اور ہندوستان کے درمیان کشیدگی کے خاتمے اور اختلافات بات چیت سے دور کرنے پر زور دیاہے۔
امریکی محکمہ خارجہ کے مطابق وزیرخارجہ مارکوروبیو نے پاکستانی آرمی چیف جنرل سید عاصم منیر سے ٹیلیفونک رابطہ کیا جس میں کشیدگی کم کرنے کے لیے تعاون کی پیشکش کی ہے۔ امریکی وزیرخارجہ نے کہا کہ پاکستان اور ہندوستان تحمل سے کام لیں، خطے میں امن کی بحالی پوری دنیا کے لیے اہم ہے۔ انہوں نے کہا کہ امریکا بات چیت کے لیےکردار ادا کرنے کے لیے تیار ہے۔
چین نے بھی خطے کی بگڑتی ہوئی صورتحال پر گہری تشویش کا اظہار کیا ہے۔ چینی وزارت خارجہ نے زور دیا ہے کہ پاکستان اور ہندوستان تحمل کا مظاہرہ کریں اور امن و استحکام کو یقینی بنانے کے لیے سنجیدگی سے کام کریں۔چین نے دونوں ممالک پر زور دیا کہ وہ سیاسی تصفیے کی راہ پر واپس آئیں اور ایسے کسی بھی قدم سے گریز کریں جو کشیدگی میں مزید اضافہ کرے۔
