اقوام متحدہ اسرائیل کو شام کے خلاف جارحیت سے روکے، ایرانی وزیرخارجہ کا خط

تہران : ایران کے وزیرخارجہ امیر عبداللہیان نے شام پر اسرائیلی حملوں کیخلاف اقوام متحدہ کے سیکریٹری جنرل انتونی گوتریس کو خط لکھ دیا۔ انہوں نے لکھا کی فلسطینیوں کے قتل عام میں ملوث صیہونی دہشت گرد حکومت کی جانب سے شام کی خودمختاری اور سرحدی حدود کی خلاف ورزی قابل مذمت ہے۔ ایران دمشق میں اپنے فوجی مشیروں پر صیہونی حملے کا جواب دینے کا مکمل حق رکھتا ہے۔ انہوں نے اقوام متحدہ کے سربراہ کے نام خط میں لکھا کہ صیہونی حکومت کی جانب سے بین الاقوامی قوانین اور اقوام متحدہ کے چارٹر کی خلاف ورزی کی جارہی ہے۔ اسرائیلی جارحانہ کارروائیوں کی وجہ سے خطے کی سلامتی کو سنگین خطرات لاحق ہوگئے ہیں۔ انہوں نے لکھا کہ اسرائیل کی جانب سے ایرانی دفاعی مشیروں پر حملہ مکمل غیر قانونی ہے کیونکہ یہ مشیر شام کی حکومت کی درخواست پر دہشت گردی کے خلاف جنگ میں شامی حکومت سے تعاون کے لئے دمشق گئے تھے۔ عبداللہیان نے کہا کہ ایران صیہونی حکومت کے حملوں کی پرزور مذمت کرتا ہے۔ اسرائیل شام میں حملے کرکے فلسطین مخصوصا غزہ کے خلاف صیہونی فورسز کے مظالم سے دنیا کی نظریں ہٹانا چاہتا ہے۔ انہوں نے لکھا کہ اسرائیلی کارروائیاں خطے میں امن اور سلامتی کے لئے اقوام متحدہ کی کوششوں کو دھچکہ لگنے کا باعث ہیں۔