ممنوعہ کلسٹر بم کی پہلی کھیپ یوکرین کو موصول

کیف : امریکا نے ممنوعہ کلسٹر بموں کی پہلی کھیپ یوکرین کو فراہم کردی۔ امریکا نے ایک ہفتے قبل یوکرین کو سو سے زیادہ ممالک میں ممنوعہ کلسٹر بم فراہم کرنے کا اعلان کیا تھا۔ امریکی لیفٹیننٹ جنرل ڈگلس سمز نے یوکرین کو کلسٹر بم موصول ہونے کی تصدیق کی اور اسے اہم پیشرفت قرار دیا۔ انہوں نے یوکرین کی جوابی کارروائی میں پیش قدمی کی سست رفتار سے متعلق سوال پر کہا کہ یہ سخت جنگ ہے اور یہ واقعی سخت علاقے میں ہورہی ہے۔ یوکرینی حکام نے کہا کہ کلسٹربموں کو قانونی فریم ورک کے اندر سختی سے استعمال کیا جائے گا۔ وہ روسی سرزمین پر استعمال نہیں ہوں گے۔ یہ صرف ان علاقوں میں استعمال کیے جائیں گے جہاں روسی فوجی دستے دفاع کو توڑنے کے لیے مرکوز ہیں۔ روس نے خبردار کیا ہے کہ اگر ان ہتھیاروں کا سامنا ہوا تو وہ بھی ایسے ہی ہتھیاروں کا استعمال کرسکتے ہیں۔ادھر روسی صدر پیوٹن نے کہاہے کہ نیٹو کی رکنیت سے خود یوکرین کی سلامتی میں اضافہ نہیں ہوگا، بلکہ یہ اقدام دنیا کو بہت زیادہ خطرے میں ڈال دے گا۔