Raza Musani 
واشنگٹن: امریکی دارالحکومت واشنگٹن میں یہودی میوزیم کے باہر فائرنگ سے اسرائیلی سفارتی عملے کے دو ارکان ہلاک ہوگئے۔ پولیس نے ایک مشتبہ شخص کو گرفتار کرلیا۔ واشنگٹن میں فائرنگ کا واقعہ اس وقت پیش آیا جب سفارتی عملے کے ارکان تقریب کے بعد کیپٹل یہودی میوزیم سے باہر نکل رہے تھے۔ ہلاک ہونیوالا ایک نوجوان جوڑا ہے۔ پولیس نے حملہ آور کو گرفتار کر لیا ہے۔ جس کی شناخت تیس سالہ الیاس روڈریگیز کے نام سے کی گئی ہے جو شکاگو کا شہری ہے۔ پولیس حکام کا کہنا ہے کہ ملزم نے گرفتاری کے وقت فلسطین کو آزاد کرو کے نعرے لگائے۔ میٹروپولیٹن پولیس ڈپارٹمنٹ کی سربراہ پامیلا اسمتھ نے نیوز کانفرنس میں بتایا کہ فائرنگ سے قبل روڈریگز کو میوزیم کے باہر گھومتے ہوئے دیکھا گیا تھا۔ فائرنگ کے بعد وہ میوزیم کے اندر گیا لیکن اسے سیکیورٹی نے روک دیا۔ امریکی صدر ٹرمپ نے واقعہ کی مذمت کی ہے۔
