بلوچستان میں دو دھماکے، 22 افراد جاں بحق

کوئٹہ: بلوچستان میں دو دھماکوں میں بائیس افراد جاں بحق اور پینتالیس زخمی ہوگئے۔ پشین میں آزاد امیدوار جبکہ قلعہ سیف اللہ میں جے یو آئی کے انتخابی دفتر کو نشانہ بنایا گیا۔ کئی زخمیوں کی حالت تشویشناک بتائی جاتی ہے۔ اسپتالوں میں ایمرجنسی نافذ کردی گئی۔ الیکشن کمیشن نے دونوں دھماکوں کا نوٹس لے لیا۔ پہلادھماکا پشین کے علاقے خانوزئی میں پی بی 47 سے آزاد امیدوار اسفند یار کاکڑ کے انتخابی دفتر کے باہر ہوا۔ جس کے نتیجے میں 12 افراد جاں بحق ہوگئے۔ ریسکیو ٹیموں نے موقع پر پہنچ کر لاشیں اور زخمیوں کو اسپتال منتقل کیا۔ کئی زخمیوں کی حالت تشویشناک بتائی جاتی ہے۔ عینی شاہد کے مطابق دھماکا انتہائی زور دار تھا۔ پشین دھماکے کے کچھ ہی دیر بعد قلعہ سیف اللہ بھی دھماکے سے گونج اٹھا۔ این اے 251 سے جے یو آئی کے امیدوار مولانا عبدالواسع کے انتخابی دفتر کو نشانہ بنایا گیا۔ دھماکے سے کئی افراد جاں بحق و زخمی ہوئے۔ زخمیوں اور لاشوں کو ریسکیو ٹیموں نے اسپتال پہنچایا۔ مسلسل دھماکوں کے بعد اسپتالوں میں ایمرجنسی نافذ کردی گئی۔ شدید زخمیوں کو کوئٹہ منتقل کیا جارہا ہے۔ الیکشن کمیشن نے دونوں دھماکوں کا نوٹس لے کر چیف سیکریٹری اور آئی جی بلوچستان سے فوری رپورٹ طلب کرلی ہے۔