ترکی کو عراق سے امریکا کے ذلت آمیز انخلاء سے سبق حاصل کرنا چاہیے، حزب اللہ عراق

بغداد : عراق کی مزاحمتی تنظیم حزب اللہ کا کہنا ہے کہ ترکی کو عراق سے امریکا کے ذلت آمیز انخلاء سے سبق حاصل کرنا چاہیے اور یہ جاننا چاہیے کہ اسلامی مزاحمت نے کس طرح اس ملک پر ذلت آمیز شکست اور انخلاء مسلط کیا۔ حزب اللہ کے بیان میں ترک فوجیوں کے حالیہ حملوں پر ردعمل ظاہر کرتے ہوئے اسے عراق کی خودمختاری کی خلاف ورزی قرار دیا۔ اور کہا کہ عراق پر ترکی کی مسلسل جارحیت نہ صرف اس کی خودمختاری کی خلاف ورزی ہے بلکہ اس کے عوام اور حکومت کی توہین بھی ہے۔ عراقی حکومت ان جارحیتوں کے سامنے خاموش رہنے کے سوا کچھ نہیں کر رہی، انہوں نے کہا کہ بعض سیاسی گروہوں کے ساتھ اس کے تعاون اور ان کے عزم نے ترکی کو عراقی سرزمین پرغاصبانہ قبضے کی جرأت فراہم کی ہے۔ ترکی شہریوں کے خلاف گھناؤنے جرائم کا ارتکاب کر رہا ہے، انہوں نے زور دیا کہ انقرہ عراق کو دجلہ اور فرات میں پانی کے حقوق سے بھی محروم کر رہا ہے اور اچھی ہمسائیگی کے اصول اور اپنی خودمختاری کا احترام نہیں کرتا۔ عراقی تحریک نے اس بات پر زور دیتے ہوئے کہا کہ عراقی عوام اور مزاحمت کار ترکی کی جارحیت کا سامنا کرنے اور ترکی کے قبضے سے اپنی سرزمین خالی کرانے کے لیے تیار ہیں۔