ٹرمپ کی دھمکیوں کی کوئی اہمیت نہیں، قیدی معاہدے پر عملدرآمد سے رہا ہوں گے، حماس

حماس نے امریکی صدر ڈونلڈ ٹرمپ کے الٹی میٹم کو سختی سے مسترد کرتے ہوئے کہا ہے کہ ٹرمپ کو یاد رکھنا چاہیے کہ اسرائیلی اسیران کی واپسی کا واحد راستہ معاہدے کا احترام کرنا ہے۔ حماس کے سیاسی بیورو کے اعلیٰ عہدے دار سمیع ابو زہری نے کہا ہے کہ دھمکیوں کی زبان کی کوئی اہمیت نہیں ہے یہ صرف معاملات کو پیچیدہ بناتی ہیں۔ اسرائیلی اسیران کی واپسی کا واحد راستہ جنگ بندی ہے۔ انہوں نے کہا کہ غزہ میں جنگ بندی کو برقرار رکھنے کے لیے، دونوں فریقوں کو اپنی ذمہ داریوں کی تعمیل کرنی چاہیے۔ انہوں نے امریکی صدر کے غزہ جنگ بندی کی منسوخی کے مطالبے کی مذمت کی۔
اس سے پہلے حماس نے معاہدے پر مکمل عملدرآمد نہ کرنے پر ہفتے کو کی جانیوالی اسرائیلی قیدیوں کی رہائی مؤخر کردی تھی۔حماس کے عسکری ونگ القسام بریگیڈز کے ترجمان ابو عبیدہ نے کہا ہے کہ گزشتہ 3 ہفتوں کے دوران مزاحمتی گروہوں نے اسرائیل کی جانب سے جنگ بندی معاہدے کی متعدد خلاف ورزیوں کو نوٹ کیا جن میں بے گھر فلسطینیوں کی شمالی غزہ واپسی میں تاخیر کرنا اور ان پر بمباری کرنا بھی شامل تھا۔