ٹرمپ کی ہرزہ سرائی، غزہ پر قبضے اور فلسطینیوں کو بیرون ملک بسانے کا اعلان

واشنگٹن : امریکی صدر ڈونلڈ ٹرمپ نے غزہ پر قبضے اور فلسطینیوں کو کسی اور مقام پر بسانے کا اعلان کردیا۔ وائٹ ہاؤس میں اسرائیلی وزیر اعظم بنیامین نیتن یاہو سے ملاقات کے بعد ڈونلڈ ٹرمپ نے کہا کہ ہم غزہ کی ملکیت حاصل کریں گے اور فلسطینیوں کے کسی اور مقام پر آباد ہونے کے بعد غزہ کو دوبارہ تعمیر کریں گے۔ انہوں نے کہا کہ غزہ کو مشرق وسطیٰ کے رویرا میں تبدیل کر دیں گے جہاں فلسطینیوں سمیت دنیا بھر کے لوگ رہیں گے۔ انہوں نے کہا کہ امریکا غزہ کو ترقی دے گا۔ ہزاروں ملازمتیں پیدا کرے گا اور اسے ایک ایسی جگہ میں بدل دے گا جس پر پورا مشرق وسطیٰ بہت فخر کر سکتا ہے۔ انہوں نے کہا کہ فلسطینیوں کے پاس ملبے کے ڈھیر غزہ کو چھوڑنے کے علاوہ اور کوئی راستہ نہیں ہے۔ صدر ٹرمپ نے یہ بھی کہا کہ غزہ کی تعمیر نو کے دوران امریکی فوج کو تعینات کرنے کے امکان کو رد نہیں کر سکتے۔