تل ابیب سمیت مختلف شہروں میں ہزاروں افراد کا یرغمالیوں کی رہائی اور نتن یاہو حکومت کیخلاف احتجاج

تل ابیب: اسرائیل کے دارالحکومت تل ابیب سمیت مقبوضہ فلسطین کے مختلف شہروں میں ہزاروں اسرائیلی سڑکوں پر نکل آئے۔ یرغمالیوں کی رہائی نہ ہونے پر اسرائیلی شہریوں کے صبر کا پیمانہ لبریز ہوگیا۔ دارالحکومت تل ابیب سمیت مختلف شہروں میں ہزاروں افراد نے نیتن یاہو حکومت کیخلاف احتجاج کیا۔ مظاہرین نے یرغمالیوں کی رہائی کیلئے جلد معاہدے اور ملک میں نئے الیکشن کا مطالبہ کیا۔ تل ابیب میں پولیس اور مظاہرین کے درمیان جھڑپیں ہوئیں۔ مظاہرے میں شامل ایک شخص نے پولیس اہلکار کو گھونسہ جڑ دیا۔ پولیس نے چھ مظاہرین کو گرفتار کرلیا ہے۔ ادھر ایک ڈرائیور نے اپنی کار مظاہرین پر چڑھادی جس سے چھ مظاہرین زخمی ہوگئے۔ اسرائیل صدر اسحاق ہرزوگ نے مظاہرے کے دوران ایک کار کی ٹکر سے پانچ افراد کو زخمی کرنے کے بعد کہا ہے کہ تشدد ایک سرخ لکیر ہے جسے کسی بھی حالت میں عبور نہیں کیا جانا چاہیے۔