ہزاروں اسرائیلیوں نے پرتگال کی شہریت کیلئے قطاریں لگالیں

تل ابیب : اسرائیل میں ہزاروٖں افراد نے پرتگال کی شہریت کیلئے سفارتخانے کے باہر قطاریں لگالیں۔ آن لائن بکنگ سسٹم پر دباؤ کی وجہ سے تل ابیب میں پرتگال نے ہفتے کو خصوصی ملاقات کا دن رکھا تھا۔ ٹائمز آف اسرائیل کے مطابق لوگ صبح سویرے سفارتخانے پہنچے تاکہ پرتگالی شہریت یا پاسپورٹ کی تجدید کے لیے درخواست دے سکیں۔ قطاریں سفارتخانے کے دروازے سے زیرِ زمین پارکنگ تک پھیلی ہوئی تھیں۔
2015 کے قانون کے تحت سفاردی یہودیوں کو شہریت کے لیے درخواست دینے کا حق ملا تھا، تاہم درخواستوں کی زیادہ تعداد کے باعث 2023 میں شرائط سخت کر دی گئیں۔ رپورٹ کے مطابق اسرائیلی یورپی یونین میں آزادانہ آمدورفت، کم رہائشی اخراجات اور یورپی جامعات میں کم فیسوں جیسے فوائد کے لیے پرتگالی شہریت چاہتے ہیں۔ اکتوبر 2023 میں غزہ پر اسرائیلی جارحیت کے آغاز کے بعد دوسری شہریت کی طلب میں نمایاں اضافہ ہوا ہے۔ ہزاروں اسرائیلی ملک چھوڑ چکے ہیں اور پرتگالی پاسپورٹ میں دلچسپی مسلسل بڑھ رہی ہے۔