فلسطینیوں کو حقوق ملے بغیر خطے میں امن نہیں ہوسکتا، مصر

قاہرہ : مصر کے وزیر خارجہ بدر عبدالعاطی کا کہنا ہے کہ فلسطینی عوام کے حقوق کی تکمیل کے بغیر خطے میں پائیدار امن اور سلامتی ممکن نہیں۔ قاہرہ میں آئرلینڈ کی وزیر خارجہ ہیلن مک انٹی کے ساتھ مشترکہ نیوز کانفرنس میں بدر عبدالعاطی نے کہا کہ مصر غزہ سے فلسطینیوں کی کسی بھی صورت میں بے دخلی کو قبول نہیں کرے گا۔ انہوں نے غزہ کے لیے امریکی صدر ڈونلڈ ٹرمپ کے منصوبے کے دوسرے مرحلے پر فوری عملدرآمد کی ضرورت پر زور دیا۔ انہوں نے غزہ میں بلا رکاوٹ انسانی اور امدادی سامان کی فراہمی کو ناگزیر قرار دیا۔ ان کا کہنا تھا کہ غزہ کو تقسیم کرنے یا دو ریاستی حل کو کمزور کرنے والے کسی بھی اقدام کو قبول نہیں کیا جائے گا۔ انہوں نے فلسطینیوں کی جبری یا رضاکارانہ بے دخلی کے تمام منصوبے مسترد کر دیے۔