افغانستان میں اندرونی تنازعات موجود ہیں

کابل : افغانستان میں سیکیورٹی سے متعلق واقعات میں 38 فیصد اضافہ ہوگیا۔ اقوام متحدہ کی افغانستان سے متعلق سہ ماہی رپورٹ میں کہا گیا ہے کہ ملک میں اندرونی تنازعات موجود ہیں۔ خواتین اور لڑکیوں کے خلاف پابندیاں بدستور برقرار ہیں اور افغانستان کے کچھ علاقوں میں ان پابندیوں کا نفاذ مزید مشکل ہو گیا ہے۔ یکم نومبر 2023 سے رواں سال دس جنوری تک سیکورٹی واقعات میں اڑتییس فیصد اضافہ ہوا۔ سب سے زیادہ 263 واقعات ملک کے وسطی علاقوں میں پیش آئے۔ اقوام متحدہ کے سیکریٹری جنرل انتونیو گوتریس نے رپورٹ میں افغانستان میں انسانی، اقتصادی، سلامتی کے بحرانوں اور منشیات کے خلاف جنگ کا احاطہ کیا ہے۔ رپورٹ میں افیون کی کاشت اور منشیات کی پیداوار میں کمی کا خیر مقدم کیا گیا ہے۔